ហ្វីលីពីន៖ អ្នកនាំពាក្យប្រធានាធិបតីហ្វីលីពីន បានប្រាប់ទៅកាន់បណ្តាញសារព៍ត៌មានក្នុងស្រុកឱ្យបានដឹងថា ប្រធានាធិបតីហ្វីលីពីនបានដាក់សំណើរចំណាយថវិការជាតិប្រចាំឆ្នាំខ្ពស់បំផុតសម្រាប់ឆ្នាំ២០២២ខាងមុខនេះ។

លោក Rodrigo Duterte បានដាក់សំណើរនូវកញ្ចប់ថវិការចំនួន ៥,០២៤ពាន់លានប៉េសូ ដែលស្មើនឹងប្រមាណ ៩៩.១៣ពាន់លានដុល្លារសហរដ្ឋអាមេរិក ដែលត្រូវបានមន្រ្តីជាន់ខ្ពស់ និងជាអ្នកនាំពាក្យរបស់ប្រធានាធិបតីហ្វីលីពីនបានឱ្យដឹងថា នេះគឺជាសំណើរកញ្ចប់ថវិការជាតិ ដើម្បីយកមកកែប្រែ និងស្តារឡើងវិញនូវភាពដុនដាបផ្នែកសេដ្ឋកិច្ច ដែលប្រទេសនៃតំបន់អាស៊ីអាគ្នេយ៍មួយនេះបានជួបប្រទះ ក្រោយការវាយប្រហារដោយការរាតត្បាតនៃវីរុសកូវីដ-១៩។

បើតាមប្រភពដដែលនេះបានឱ្យដឹងថា គម្រោងសំណើរថវិការជាតិចំនួនជិត ១រយពាន់លានដុល្លារនេះ នឹងត្រូវដាក់ស្នើទៅកាន់រដ្ឋសភាដើម្បីប្រជុំអនុម័តនាថ្ងៃចន្ទ ដើមសប្តាហ៍ក្រោយនេះ។ គួរបញ្ជាក់ផងដែរថា កញ្ចប់សំណើរខាងលើនេះមានការកើនឡើងជាង ១១,៥ភាគរយ ខ្ពស់ជាងឆ្នាំ២០២១ ដែលហ្វីលីពីនអនុម័តកញ្ចប់ថវិការប្រមាណជាង ៨៨.៩ពាន់លានដុល្លារអាមេរិកប៉ុណ្ណោះ៕